كتبت .. ومازلت نكتب

من صغرتي نكتب باش نرضي الناس..

نعبر بلسانهم على الامن والسلام والقيم النظيفة اللي ما تقراها كان في الكتب

وهذا الكل باش يصفقو عليك ويقولو تلميذة نجيبة..

كتبت وكبرت بقلم تلميذة نجيبة..

تحفظ سطورها مالخطوط الحمرا..الي عنوانهم

لا..حرام..ممنوع ..واسكت..

يحبوني نكتب على السما الصافية والعصافر والفلاح اللي يروح فرحان لمرتو في اخر النهار ..

وننسى ضرب الكرتوش ..والعصافر اللي نسات كيفاش تطير ..والسما اللي غرقت بالغيوم..

كيفاش ننسى ناس ناسية طعم النوم خايفة مالموت اللي يدق على بابها كل يوم..

كيفاش تكتفلي يدي وتقلي اكتب عالورود ونت بشوكو قاتلني..

كيفاش تغمضلي عيني وتقلي اكتب على نهار غدوة والامال اللي باش تتحقق للشباب..

...لوقتاش هالكذبة..

...

كتبت ومانيش نادمة على حتى سطر حتى لو خانتني الحروف ساعات..

مايهمش كلامي مايوصلكش ..

المهم اني نطقت بيه..

التلميذة النجيبة كبرت وكبرت سطورها ..وجا وقتها باش تكتبلك عنوان جديد لغدوة اسمو..

اكتب وتكلم..