لقيتك..

شفتو من بعيد ..رجعلي سيناريو صغري القديم..

الاقدار جابتني لهالبلاصة بعد سنين..

بعد مضيعتني الاعوام والايام..

بعد منسيتك وصنعت ناس جديدة نساتني فيك..

....

ماحلاه صغرنا تعدى بينا كالنسمة..

قداش ضحكنا وبكينا..

وكي نغضب بكلمة حلوة ترضيني..

قتلي انا بو صغارك وانا تمنيتك..

وكبرت على الحجر احلامنا..

تتفكر..

شكون فينا الغالط انا ولا انت ..ميهمش..

المهم اني لقيتك ..

رجعت فيا الروح بعد منسيت طعم النفس..

ماحلاه الشيب في شعرك زادك وهرة..

شفت حتى انا نقص نظري والعكاز مايفارقني..

يا حسرة على ايام زمان يا عشيري وسيد حكاياتي ..

حكايات صغيرة نحكيها لصغاري ..يا ذكرياتي اللي سكنت فيا ..

هربو عليا ناسي ورجعتلي انت

دفنوني بالحيا في دار النسيان..ولقيتك انت بعد ماضعت مني..

تغزرلي من بعيد مش عارفني..

لكن انا مانسيتكش يا غالي..

عشت بصورتك وحفرتها في قلبي ..حسيت بيك راجعلي..

حرمونا نعيشو صغرنا اليد في اليد..

مكتوب نكملو حياتنا في دار النسيان ..

مايهمش..انت داري وكل ناسي..

المهم اني لقيتك..

ورغم كبري وصحتي اللي نسات معنى امل ..قلبي مازال بحبك حي ..